آنا دیلی مراسمی تبریزین آزاد دانشگاهیندا بیر بیلدیری ایله سونا چاتدی
اویرنجی نیوز: دونن چهارشنبه گونو تبریزین دانشگاه آزاد اویرنجی لری طرفینده ن آنا دیلی عزیزله مه توره نی دوزه نله ندی. بو توره نده تبلیغاتین آز اولماسینا باخمایاراق چوخلو اویرنجی آیاقدا مراسیمی ایزله دیلر. مراسیم ده بیر نئچه اویرنجی آنادیلی حاقدا چئشیدلی موضولارلا چیخیش ائتدی. چیخیش ائده نلر ایچینده آرمان اویرنجی تشکیلاتی اویه لرینده ن اولان: آیدین سرداری نیا، نیما پوریعقوب، نوید محمدی، یونس زارعیون و خانیم لاردان ایسه نیگار خیاوی و ملیحه عزیزپور گورونوردو. مراسیم ده عینی زاماندا یونسکو سازمانی دبیرینین آنا دیلی گونو ایله ایلگیلی پیامی اوخوندو. اوخونان بوتون مقاله لر و شعرلرده آنادیلی نین اهمیتی قئید ائدیلدی و ایراندا تورک دیلی نین یاساق اولما سیاستینه جدی شکیلده انتقاد اولوندو. مراسیم ده تاسف له اونیورسیته مسئوللاری طرفینده ن بعضی آخساقلیقلار یاشاندی. سالن گئج تحویل وئریلدی و بعضی اونجه ده ن دعوت اولونموش قوناقلارا چیخیش ائتمه ایذنی وئریلمه دی. مراسیمین سونوندا آرمان اویرنجی تشکیلاتی اویه سی پیمان انصاری بیر قطعنامه اوخودو.
آنا ديلي اوتورومونون قطعنامه سي
80 ايلدن بري آذربايجان وطنداشلارينين آنا ديلي ان آغير تضييقلره معروض قاليبدير و اونون آرادان آپارماسينا فرهنگي و ايقتيصادي قوهلر بيرلشيبدير. بونا رغما كي ايران ايسلام جومهوريتينين آنا ياساسينين 15-نجي اصلينده، چوخلو آخساقليقلارلا، بو موضوعا توخونولوب آما هلهده كي وار هئچ بير عملي آدديم بو موضوعدا گؤتورولمهييب، تاسوفلرله 80 ايل بوندان اولدن اولان سياستلرين آردي واردير.
بونا باخماياراق كي بو اوتورومون قورولماسيندا چوخلو موشكوللر ياراديلميشدير آما يولداشلارين چاليشماسيایله 86.12.8 تاريخينده بو اوتوروم باش اوجاليقلا قورولوب، آشاغيدا قيد اولونان ايستك لره تاكيد اولوندو:
1) آنا ديليميز، آذربايجان توركجه سينده، بوتون صينيفلرده تحصيل آپارماق
2) آذربايجان توركجه سينده تمام وقت راديو و تلویزيون كانال و يايينلارين يارانماسي
3) آذربايجان توركجه سينين ادبي و فولكلوريك فرهنگيستانينين قورولماسي
4) آذربايجان موستقیل فرهنگي كانونلار، NGO لار و درگي لرينه مجوّز صادير اولونماسي
5) ايراندا اولان ميلتلر و قوميتلره قارشي سراسري و مثلا ميلّي راديو، تلويزيون و درگي لرده اولان توهين، تخريب و آسيميلاسيونون قالديريلماسي، او جومله دن، تورك اولان اوستانلارين راديو و تلويزيونلاريندا اولان هدفلي داورانيشلارين دايانديريلماسي
6) آذربايجان ميلتينين فرهنگي ايستكلرينه سياسی و امنيتي اولان باخيشا سون قويماق
اومودوموز واركي آذربايجانليلارين قيد اولونان حاقلي ايستك لري، كي آراميشه يوكسك سايغيایله ياناشير، تئزليكله حؤرمتلي مسئوللارين عملي آدديملاريلا يئرينه يئتيريلسين.
آرمان اویرنجی تشکیلاتی
نوشته شده در جمعه دهم اسفند 1386ساعت 16:32 توسط دالغا
|
